Chin saxovat nima?

Ulug‘lardan Hayyon ibn Hibolning majlisiga orifa ayollardan biri keldi va so‘radi:

– Orangizda mening savollarimga javob bera oladigan biror kishi bormi?

Majlis ahli shu kishidan javob olasiz, deya Hayyon ibn Hibolni ko‘rsatishdi.

– Sizningcha saxovat nima? – so‘radi ayol.

– Ko‘p sadaqa va ehson qilish, – dedi Hayyon ibn Hibol.

– Bu aytganingiz dunyo bilan bog‘liq. Men dindagi saxovat haqida so‘radim.

– Chin ko‘ngildan Allohga ibodat qilish saxovatdir.

Ayol yana so‘radi:

– Qilayotgan ibodatingiz uchun Alloh taolodan evaz istaysizmi?

– Tabiiyki, ha... Alloh taolo bizga kamida birga o‘n daraja ajr va’da qilgan.

– Juda qiziq! Ham birga o‘n daraja savob kutasiz, ham o‘zingizni ibodatda saxovatlilardan sanaysiz.

Ayolning bu gapidan keyin majlis ahli sukutga cho‘mdi. Bir muddatdan keyin Hayyon ibn Hibol ayoldan so‘radi:

– Sizning nazdingizdagi saxovat qanday?

– Chin saxovat biror nima ta’ma qilmay, zavq bilan, faqat Alloh taoloning roziligini ko‘zlab ibodatda bo‘lish, samimiy bandalik etishdir. Bizning vazifamiz Allohga itoat, ibodat qilish. Tangri taolo istaganini qilguvchi, dillarimizdagi sirlarni-da bilguvchidir. Ko‘nglingizdan kechganlardan xabardor ekanini bila turib, dilingizda ta’ma bilan Alloh taologa ibodat qilishga uyalmaysizlarmi?..

“Irfon” taqvimining 2011 yil, 2-sonidan olindi