Yaxshilikning rahmati va yomonlik qabohati

Inson toki o‘zini mayda gap, o‘chakish, janjal, shikoyat, norozilik, ohu vohlardan ozod qilolmas ekan, u iflos va pastlik tabiatidan xalos bo‘lolmaydi.

Makorimul-axloq (yuksak xulq) quyidagi o‘n xislatdan ibodatdir: saxovat va hayo, rostgo‘ylik va omonatni joyiga berish, kamtarlik va rashk, shijoat va halimlik, sabr va shukr.

Yomonlik butun nuqsonlar majmuidir.

Qo‘rquv bilmayin desang, yovuzlik qilma.

Kim yovuzlik urug‘ini sepsa, pushaymonlik yig‘ar.

Qachonki savdogar kiyimning yaxshi tarafini ko‘rsatib, yomon joyini yashirib sotsa, o‘sha - yolg‘onchidir. Shuningdek, molini qorong‘u joyda ko‘rsatsa, shu kabi maxsining eng yaxshi poyini ko‘rsatib sotsa, u -firibgardir.

Biz - insonlar xuddi yaxshilikka undamaslik va yomonlikdan qaytarmaslik to‘g‘risida bir-birimiz bilan kelishib olganga o‘xshaymiz. Bu ketishda boshimizga qanday azoblar tushajagini koshki bilsaydik.

Birovga sog‘insa har kim yomonlik,
Nihoyat ul o‘zi topmas omonlik.

Yaxshiliklarning eng foydalisi sadaqadir.

Insonga «Nima ish yaxshidir?» dedi, - Xomushlik, xomushlik, yana xomushlik!

O’z farzandingni yaxshi xulq-odobli va aqlli bo‘lishga o‘rgat. Kimki yoshlikdan yaxshi xulq-odob egallamas ekan, ulg‘ayganda undan bilim talab qilma.

Tunu kunni o‘tkazaman-u, ammo bugungi kunim kechagi kunimdan yaxshiroq bo‘lmayotir. Chunki zamona kundan-kunga halokat tomon bormoqda. Shunday ekan, kechagi kun bugungidan a’loroq, bugungisi esa ertangidan yaxshiroqdir.

Kim aqli bilan cheklansa, adashadi. Kim odamlarga kibr qilsa, xor bo‘ladi. Kim amalga berilsa, qiyinchilikka duchor bo‘ladi. Kim odamlar ustidan faxrlansa, sinadi. Kim ahmoqlik qilsa, haqoratlanadi. Kim razillar bilan suhbatdosh bo‘lsa, tubanlashadi. Kim ulamolar bilan o‘tirsa, viqorli bo‘ladi. Kim yomonlik ko‘chasiga kirsa, tuhmatga yo‘liqadi. Kim dinda dangasalik qilsa, o‘tirib qoladi.

Odamlarning yaxshirog‘i o‘z qalbida yaxshilikka yo‘l ochgani va yomonlikni hamda ochko‘zlikni haydab chiqarganidir.

Yaxshilik va ezgulik yomonlikdan qochgani yanglig‘ yomonlik ham yaxshilikdan qochib ketadi.

Muloyimlik daraxtini ekkan kishi salomatlik mevasini teradi. Qiynalishdan qo‘rqib, o‘rganishni davom ettirmagan kishi ilmni egallay olmaydi. To‘g‘ri, haq gapirgan kishi hammaning ishonchini qozonadi. Dushman bilan yaqinlashgan kishidan uning do‘stlari qochadilar. Ishining oqibatini o‘ylagan kishi falokatlardan omon qoladi.

Yomonlar suhbatidin hazar et,
Yomonlar ulfatiga qo‘shilma, ket.

It qopmaydi, ot tepmaydi dema, negaki bu odat ularning tabiatida bordir.

Odam borki, odamlarning naqshidur,
Odam borki, hayvon undan yaxshidur.

Yolg‘on so‘zlash, ezmalik, takabburlik, chaqimchilik kishining obro‘sini yo‘qotadi. Vafodorlik, sabr qilishlik, shoshma-shosharlikdan parhez qilish va tavoze’ obro‘sini ko‘taradi.

Bolalarini pisand qilmagan millatlar inqirozi ularni yot qo‘llarga va yot madaniyatlar ixtiyoriga berib qo‘yganlari sababliki, ulardan ayrilishga mahkumdirlar.

Kumushning tashqi ko‘rinishi oppoq bo‘lsa ham, qo‘lda va cho‘ntakda ko‘p ushlansa, qora yuqtiradi. Shunga o‘xshash ba’zi odamlarning so‘zlari zohirida kumush kabi porloq va toza ko‘rinsa ham, lekin qayg‘u va zarar keltiradi.

Yaxshilar ketidan agar choparsan,
Istaging, baxtingni shunda toparsan.

Haqiqiy va komil inson yomon xislatlardan, noma’qul va nomarg‘ub xulq-atvordan pok bo‘ladi, go‘zal sifat va axloq bilan o‘zini orasta qiladi, halol mehnat qilib umr kechiradi, yomonlardan chetlanadi, yaxshilar qatoridan joy oladi, hech kimga ozor bermaydi.

Jiddu jahd - serharakatlilik, g‘ayrat va matonat bilan bir ishga kirishmoqlikdir. Bu sifat eng go‘zal sifatlardan bo‘lib, himmatga tobe’dir.

Yaxshiga yaxshi bo‘l, yomonga yomon,
Gulga gul bo‘lgin-u, tikonga tikon.

Yaxshilik qilganingizda Allohga hamd ayting, mabodo biror gunoh ish sodir etib qo‘ysangiz, albatta Allohdan mag‘firat so‘rang.

Tinglashda birinchi, gapirishda esa oxirgisi bo‘l.

Insof - oliyjanoblik belgisidir.

Yaxshi qiliq, go‘zal muomala bir yo‘ldirki, u yo‘l bilan yurmasdan turib, izzat va sharaf manziliga yetib bo‘lmaydi. U yo‘lga qadam bosmasdan turib, vujud yukini hayvoniyat biyobonidan insoniyat dorilmulkiga eltib bo‘lmaydi.

Odamlar bilan ularning aqliga monand gaplash.

Agar yaxshilikka burishning bironta yo‘li bo‘lsa, mo‘min birodaringdan chiqqan so‘z haqida faqat yaxshi gumon qil.

Jamiyatda bir odamning yomon xulqi hammaga ta’sir qiladi. Sachragan ozgina loy ming chandon ko‘p hajmdagi suvni bulg‘aydi.

Bu sham boshqa bir shamni yoqishi bilan nuridan hech narsa kamaymaydi.

Yaxshi kishilar haqida yomon gumon qilish - badgumonlik. Lekin ahli fisqdan nima fosiqlik zohir bo‘lgan esa, shuni gumon qilishga haqqimiz bor.

Buzuq niyatli va yomon axloqli kishilar o‘rtaga kirib olishi bilan ish to‘g‘ri bo‘lmaydi.

Biron qog‘ozga qo‘l qo‘ymoqchi bo‘lsang, biron odamni xafa qilib qo‘ymaslikni o‘yla!

Qo‘lda tosh bo‘lsa-yu tosh uzra ilon,
Jinoyat bo‘ladi urmasang shu on.

Go‘zal fe’l-atvorning nishonasi o‘n narsadir: birinchi nishonasi -yaxshilik, ikkinchi - insofli bo‘lish, uchinchi - boshqa odamdan ayb qidirmaslik, to‘rtinchi - biror kishida nojo‘ya harakat ko‘rsa, uni yaxshi yo‘lga boshlash, beshinchi - bir odam o‘z aybiga iqror bo‘lib uzr aytsa, uzrini qabul qilish, oltinchi - boshqalar uchun mashaqqatni o‘z ustiga olish, yettinchi - faqat o‘z manfaatinigina ko‘zlamaslik, sakkizinchi - ochiq yuzli, shirin so‘zli bo‘lish, to‘qqizinchi - muhtojlarning hojatini chiqarish, o‘ninchi - muloyim va tavoze’li bo‘lishdir.

Fojirlar bilan hamsuhbat bo‘lma, ularning fujurlaridan o‘rganasan.

Kimsaki tark ayladi o‘z aslini,
Qayta izlar ro‘zg‘orin vaslini.

O’z istagiga erishishga taqdir yordam bermagan kishiga malomat qilinmaydi.

Bir kishi sen bilan munosabatida xato qilsa-yu, senga uzr bayon etsa, uzrini qabul qilishni kechiktirma!

Dahr orzularni yangilaydi, taqdirni yaqinlashtiradi, yomon istaklardan uzoqlashtiradi.

Vaqti-soati o‘tgandan so‘ng ijro bo‘ladigan  va’dadan hech bir yaxshilik bo‘lmas.

Ko‘nglimizga qo‘nmas birovdan g‘ubor,
Bizdan ham birovga yetishgay ozor.

Yaxshining so‘ngagi tuproqda chirisa ham, nomi qoladi.

Ilonning bolasi ilondir, ilon,
Zaif shoxdan yomon mevadir nishon.

Bir joyda axloqsizlik yoyilsa, Alloh (yaxshi-yomonni ayirmay) barchaga birday balo yuboradi.

O’zgalar g‘amini chekmasa odam,
Anga noloyiqdir inson, degan nom.

Qadimda ezgu ishlarni ko‘p qilishardi, lekin gapirishmasdi. Keyin ham qiladigan, ham gapiradiganlar keldi. Endi esa faqat gapirishmoqda.

Yaxshilar bilan hamsuhbat bo‘lish va donolar bilan muloqot qilish saodatga eltadi.

Foydasiz narsaga urinma.

Kishilardan o‘zingga nisbatan qanday muomala kutsang, ularga o‘zing ham xuddi shunday muomala qilgin.

Kasalning vasiyat qilishi uning uchun yaxshilik keltiradi.

Kimki baxt-iqbolli, solih kishilarning etagini tutsa, u albatta murodiga erishib, xayru baraka topadi.

Yaxshilik haqida o‘ylashlik o‘sha yaxshilikka amal qilishga undaydi. Yomonlikka nadomat esa, o‘sha yomonlikni tark etishga chorlaydi.

Kimki ehtiyot sovutini kiyib olsa, zamon hodisalarining o‘qidan omon bo‘ladi.

Insonlarga marhamatli bo‘ling, qadringiz oshadi.

Chiyabo‘ri qo‘shnichilikka rioya qilib qo‘shnisini yemaydi.

Agar bizni va roziligimizni istasang, buning ko‘ngillarni ishg‘ol qilish bilan amalga oshishini unutma!

Alloh banda yaxshiligiga muhtoj emas, ammo bir yomonlik seni yaxshilikka eltsa ajab emas.

Kim o‘zining aybini bilsa, boshqa kishining aybi bilan ishi bo‘lmay qoladi. Kim taqvo libosidan yalang‘och bo‘lsa, unga hech kim parda tutolmaydi. Kim Allohning bergan rizqiga rozi bo‘lsa, boshqalarning qo‘lidagi narsaga xafa bo‘lmaydi. Kim zulm qilichini sug‘ursa, shu qilich bilan qo‘li kesiladi. Kim birodariga choh qazisa, unga o‘zi tushadi. Kim birovning parda-hijobini oyoqosti qilsa, o‘zining avrati ochiladi. Kim o‘z xatosini unutsa, boshqaning xatosini katta biladi. Kim katta ishlarga kirishsa va o‘ziga xatarli yo‘l topsa, halok bo‘ladi.

Odamlarga odamlarning yoqimlirog‘i odamlardan behojat bo‘lgani va ulardan hech narsa so‘ramaydiganidir. Odamlarga odamlarning yoqmaydigani ularga muhtoj bo‘lganidir. Alloh uchun odamlarning suyumlirog‘i Allohga muhtoj bo‘lgani va undan so‘ragani, Allohga odamlarning yomonrog‘i Undan behojat bo‘lgani va hech narsa so‘ramaganidir.

Haromdan topilgan bir dirhamni tark etish yuz ming dirhamni sadaqa qilishdan afzaldir.

Yaxshi fe’l bilan odamlar ko‘nglini olib, o‘zingni yomon qiliqlardan saqlab yasha.

Sabr ikki xil bo‘ladi: yomon ko‘rilgan narsaga chidamoqlik va yaxshi narsani eshitishga sabr etmoqlik.

Agar xalqning boshchisi yaxshi bo‘lsa, uning xizmatchilari yaxshi bo‘ladi.

Shirinso‘zlik va muloyimlik baloni qaytarishga qodir.

Kuchli odamlarga yarashmaydigan ish - kuchsizlardan qasos olish.

To‘g‘ri va haq yo‘ldan yurgan kishining qadam bosishi arslon yurishidan ham mahobatliroq haybatliroq dir.

Kechira olishlik - mardlik, kechira bilmaslik - nomardlik sanaladi.

Vayron ko‘ngullarni karam changi bila obod qil.

Payg‘ambarlar va ularning vorislari - avliyolar, ya’ni komil inson bo‘lganlar bashariyat niqobi bilan o‘ralgan quyoshlardir. Ularning himoyasida bo‘lki, senga doim yomonlik qiladigan nafsingning qo‘lidan qutulasan.

Har na yaxshilik qilsang, qilki yurt uchun,
O’zingdan orttir-u o‘zgaga bermak uchun.

Yaxshi qiliq oq sut bilan kirsa, o‘lim kelib tutmaguncha o‘zgarmaydi.

To‘rt narsa saodat dalilidir: to‘g‘ri so‘z, tavoze’, halol kasb-hunar, sir saqlash.

O’zingga yaxshilik qilinishini istasang, yaxshilik qil, hech kimga ozor berma, yaxshilikni ulug‘ ish deb bil!

 
Kishi o‘zligidan yaxshi-yomon ham,
Qazo-yu qadaru quvonch yoki g‘am.

Yaxshi odam bo‘lish uchun ibodat qilishning o‘zi kifoya emas, balki yaxshi qalbli, yomonlarni yomon ko‘ruvchi bo‘lish kerak.

Husni xulqdan yaxshilik ustiga yaxshilik qo‘shadigan, hasaddan ko‘ra yomonlik ustiga yomonlik qo‘shdigan narsa ko‘rmadim.

Yomon, noraso e’tiqod bilan qilingan ezgu ish sarob va kul kabi hech qanaqa foyda bermaydi.

Mening ikki toifadagi odamlarga: biror narsaga intilmaydigan iqtidorli odamga va qobiliyatsiz serhafsala odamga rahmim keladi.

Qutulishing qiyin bo‘lgan odamga nafratingni bildirma!

Eng yaxshi kishining ikki qo‘li ham to‘g‘ri bo‘ladi, u bir qo‘li bilangina emas, ikki qo‘li bilan yaxshilik qiladi.

Maqsad talabi yo‘lida himmatingiz onqadar bo‘lsinkim, basharti mening boshimga oyoq qo‘yib o‘tishga to‘g‘ri kelsayu va siz o‘tmasangiz - aslo kechirmasmen.

Itdan - kiyikka, mushukdan - kabutarga shafqat maholdir.

Yomon ham o‘tar, yaxshi ham - yaxshi bil,
Seni yaxshi nom birla yod etsin el.

Adabli bo‘lmoq faqirlarga yo‘lanmakdir. Adabli bo‘lmoq dunyodorlarga ziynat va oroyish bag‘ishlaydi.

Xo‘kizlar gunoh qilsa har qachon,
Poda sohibi to‘laydi tovon.

Yomon fe’lli kishidan haromdan parhez qilgandek parhez qilinglar.

Yaxshilarning suhbati bandani Allohga yaqin qilur.

Evaziga narsa kutib qilingan yaxshilik-yaxshilik hisoblanmaydi, balki u oddiy oldi-berdidan iborat, xolos.

Go‘zal sifat va husni xulq siyratlari bezamagan kishini hech qanday chiroyli kiyimlar ko‘rkam qilolmas, gunoh va xatolardan saqlanmagan kimsaning qalbi sira aybdan forig‘ bo‘lmas.

Gar qilsa sitam kishi kishig‘a,
Go‘yo sitam aylamish o‘zig‘a.

Yomonlarga marhamat va yaxshilik qilish yaxshilarga zarar va alam keltiradi.

Odamlarga zarari ham, foydasi ham tegmaydigan kishidan faqirroq odam yo‘q.

Yer yuzida yaxshilarga,
Yaxshilikdan yaxshi yo‘q.

Odamlar ichida eng bo‘lmag‘uri istagi yo‘q kishidir.

Shon-shavkat yuksak maqsad sari intilganning mulkidir.

Odamiyga yomon ayb shuki, o‘ziga ziyon yetkazadigan narsaga erishganiga shod bo‘lgay.

Kishini ranjitmoq juda ham yengil,
Ko‘nglin olmoq esa, unday emas, bil.

Mas’uliyatsiz, kayfu safo ichra yashash ishtiyoqi va gunohlar qalbni butunlay o‘rab oladi. Yaxshilik va haqiqat tuyg‘ulari endi qalbga qanday qilib kirsin?!

Yaxshilikni bilmasang, bori, yaxshilarga qo‘shul.

Yaxshi qo‘shni senga ziyon va tashvish yetkazmaydigan qo‘shni emas (aslida bunday qo‘shni ham yaxshi), balki sening yomonligingga chidab yashayotgan qo‘shnidir.

Xalq yaxshi bo‘lsa, yaxshi boshliq keladi, xalq yomon bo‘lsa, yomon boshliq.

Yaxshilik qilmishdir kim senga bir bor,
Yodingdan chiqarma sen uni zinhor.

Agar yomonlik qilmagan bo‘lsang, kishilardan hadiksirmagin. Hamisha o‘z qilmishingninghimoyatiga sig‘ingin.

Yordamini o‘zgalardan darig‘ tutmagan inson zikri keng yoyiladi.

Niyatlarga ko‘ra qancha-qancha ishlar ulug‘ bo‘ladi, yana qancha-qancha katta ishlar niyatlarga ko‘ra arzimasga aylanadi.

Bir musulmonning  og‘zidan chiqqan so‘zni yomonga yo‘yma,  sen  u  so‘zni yaxshilikka yo‘yishga harakat qil.

Har bir kishi o‘ziga qarab ta’rif qilinsa, ishiga qarab tavsiflanadi, maqtaladi. Fazilat nasl-nasab bilan emas, aql-adab bilandir.

Quruq yog‘och egilmaydi, quruq novda gullamaydi.

O’zgalarga ozor berishdan saqlanish yaxshilik alomatlaridandir.

Bu eski olamda aylag‘il bunyod -
Bir narsaki, xalqing etsin seni yod.

Kim o‘z sirini berkitsa, yaxshilik uning qo‘lidadir.

Adabli  bo‘linglar,  chunki  u  muhtoj  paytingizda mol  bo‘ladi,  istig‘no vaqtingizda husn-jamol.

G’oz qo‘zg‘olsa, ko‘lni o‘rdak egallaydi.

Kechirish - eng yaxshi g‘alabadir.

Dunyodagi barcha ne’matlardan faqat yaxshi nom qoladi, hatto shuni ham qoldirolmagan odam baxtsizdir.

Kim o‘zini tuhmat qilinadigan o‘rinda ko‘rsatsa, unga nisbatan yomon gumon qiladiganlarni malomat etmasin.

Egrilik hosili qabohat erur,
To‘g‘rilik hosili saodat erur.

Odamlar yoqtirgan  kishilari tarafini olib, yomon  ko‘rgan  kishilarini ta’na qilishadi.

Savdogarning moli toza, beshubha bo‘lsa, yo‘l ustida yeydi.

To‘g‘rilikdan kelmish hamma yaxshi ot,
Egrilikdan foyda ko‘rmadi bir zot.

Har kimki poknazardir, jahonda mo‘‘tabardir.

Agar havoda chang va tutun bo‘lmasa edi, kishi ming yil yashagan bo‘lardi.

O’zgalar aybiga tetik nazar sol,
O’z aybing ko‘rgandek undan ibrat ol.

Yomondan nari yurish farz, bu qabohatning oldini oladi. Yaxshiga yondoshgan ayni muddao, bu fazilatga yo‘l ochadi.

Qarindosh-urug‘ va do‘stlarning xato-ayblarini kechirish - muruvvat va oliyhimmatlilik belgisidir.

Odamda bo‘lsa gar yaxshi tilak,
Xalq uchun tebratgusi doim bilak.

Komil narsa ortiqchalikni ham, kamchilikni ham qabul etmaydi.

Saodatmand, dono odamlar xush fe’l-atvorni o‘zlariga abadiy najot sarmoyasi deb biladilar. Fursat, vaqtni qo‘ldan qochirmaydilar, g‘animat sanaydilar. Go‘zal axloq-odob bilan ziynatlanadilar.

To‘g‘rini de, to‘g‘rini ko‘r, to‘g‘ri yur,
To‘g‘ri gapir, to‘g‘ri eshit, to‘g‘ri tur.

Hakimlarning aytishicha, xushmuomalalikning o‘nta belgisi bor: insof, aql, ilm, hilm, oliyjanoblik, ko‘rkam fe’l, yaxshilik, sabr, shukr, muloyimlik.

Birovni biron ayb bilan ayblamaslik - oqillik belgisi. Agar men birovni qachondir ayblab qo‘ygan bo‘lsam, yigirma yildan keyin bo‘lsa ham, jafosini tortganman.

Tamom umringizda har bir yomonlikdan va bekorchilikdan saqlaning. Inson o‘z uyining eshigini bekitib, vujudini saqlay oladi-yu, lekin qalbining eshigini bekitishdan ojiz bo‘ladi. Qalbiga qayg‘u, alam ko‘p vaqt hujum qilib turadi.

To‘rtta narsa kishining muruvvatidan: tilining rostgo‘yligi, birodarlarining xato-kamchiliklarini kechirishi, ahli zamonining taniqli kishisiga saxovat qilishi, tanish va qo‘shnilarga ozor berishdan tiyilishi.

Muruvvat oltita, uchtasi muqimlikda, uchtasi musofirlikda bo‘ladi. Muqimlikdagisi - Qur’on tilovati, Alloh taoloning masjidlarini obod qilish, Alloh yo‘lida birodar tutinish. Musofirlikdagisi - ozuqani sarf etish, sheriklarga kam xilof qilish, Allohga osiy bo‘lmaydigan o‘rinlarda hazil-mutoyiba qilish.

Yoyni egri ko‘rib, to‘g‘riligidan o‘q undan qanchalik qochganiga boq.

Qayda ravshan bo‘lsa to‘g‘rilik nuri,
Egrilik so‘nadi, quriydi sho‘ri.

Qabohatli suvrat, chirkin yuzning va yomon chehraning orqasida yaramas xulqdan boshqa narsa yo‘qdir.

Donishmandlar: «O’z g‘arazi, manfaatinigina ko‘zlagan odam qarindosh, xesh-aqrabo emasdir», deganlar.

Ikki narsani kishi o‘zidan quvolmaydi: biri soya, ikkinchisi - badfe’llik.

Adab kichik yoshdagilarni ulug‘lar duosiga sazovor etadi va u bu barakotdan umrbod bahramand bo‘ladi.

Adab - irfon ilmi ichradur sham’.

Beg‘araz o‘git misoli qanddir,
G’arazli o‘git oyoqqa banddir.

Vijdon azobiyu ta’nadan to‘g‘ri bo‘lmagan kimsani ta’lim-tarbiya va qiynash bilan ham to‘g‘rilash amri mahol.

Ishining mazasi bo‘lmagan kishining nasabi ish bermay qo‘yadi.

Yaxshilik chirimaydi va yomonlik unutilmaydi.

Agar tarbiyat ko‘rmasa odam,
Eshak bo‘lib qolur yuzga kirsa ham.

Qalb-tanada podshoh, a’zolar esa uning lashkarlaridir. Demak, a’zolar neki amal qilayotgan bo‘lsa, hammasi qalb amri bilandir.

Odamning tashqi qiyofasiga emas, ichki dunyosiga e’tibor berish kerak. Agar odamning tashqi qiyofasi ham, ichki dunyosi ham go‘zal bo‘lsa, yanada yaxshiroqdir.

Yaxshilarni sevib, siz haqingizda haq bir gap aytilganida qabul qilar ekansiz, xayr-barakot ichidasiz.

Pastkash kimsaning o‘z nasl-nasabini maqtab, u bilan faxrlanishi chanqoq kishining suv shu’lasi (sarob)ni ko‘rib aldangani kabidir.

Kimdaki bo‘lmasa zamona g‘ami,
Yo olamdan emas, yo emas odam.

Bugungi kunda jamiyatimizning yuzini qora qiluvchi pastkashlar, yomonlar, beboshlar, o‘g‘rilar, giyohvandlar va nashavandlar... kecha tarbiyalariga e’tibor berilmagan bolalardir.

Agar buzruk va donolardan bo‘lmoqni xohlasang, o‘z suratingni boshqalar oynasida ko‘rgin.

Yaxshilik mol va farzandlarning ko‘pligida emas. Yaxshilik keng fe’lli, axloqli bo‘lish, ilm olish va Allohga ibodat qilishda boshqalarga ibrat bo‘lishdadir.

Insoniylik shafqat va marhamat bilan boshlanadi va nihoyasiga yetadi. Insoniylikning asli shafqat va marhamatdir.

Sizga uzatilgan hamma qo‘lni tutavermang, chunki inson niqobidagi necha shaytonlar bordir.

Boshqani yo‘lga solaman, deb adashganlar juda ko‘p.

O’z qo‘ling bilan ado eta olmagan yaxshilikni boshqaning qo‘li bilan hech qachon qilolmaysan.