Molik ibn Dinor

Molik ibn Dinor (h. I-II asrlar) - avliyoulloh, Hasan Basriyning sevimli do‘sti bo‘lgan.

Badbaxtlik nishonasi besh narsadir: biri - ko‘ngil qattiqligi, ikkinchisi - ko‘z yoshlanmasligi, uchinchisi - hayosizlik, to‘rtinchisi - dunyoni sevmoqlik, beshinchisi - dunyo uchun jondan andisha aylamoqlikdir.

Agar kishi nafsida qo‘rqinch va umid alomatini bilsa, u ishonchli ishni ushlabdi. Qo‘rqinch alomati - Alloh taolo man qilgan narsalardan qaytish. Umid alomati - Alloh taolo buyurganlarini qilish.

Kimki maxluqlarning so‘zidan oshib, Alloh azza va jallaning so‘ziga rag‘bat qilmasa, uning amali kamayibdi, qalbi ko‘r va umri zoe bo‘libdi.

Havoyi nafsga berilib yashashdan saqlaning.

Dunyo hayotida qo‘lga kiritolmagan narsalaring uchun qanchalik achinsang, oxirat tushunchasi qalbingdan shunchalik o‘chiriladi.

Biz - insonlar xuddi yaxshilikka undamaslik va yomonlikdan qaytarmaslik to‘g‘risida bir-birimiz bilan kelishib olganga o‘xshaymiz. Bu ketishda boshimizga qanday azoblar tushajagini koshki bilsaydik.