Abu Yazid Bastomiy

Abu Yazid Bastomiy (vafoti 261/874) - Sharqning taniqli tasavvuf shayxlaridan, Mansur Xalloj va Ibn Arabiyga ta’sir ko‘rsatgan.

Tiriklik - ilm bilan bo‘lur, rohat - ma’rifatda bo‘lur va lazzat -Xudoning zikrida bo‘lur.
   
Oqil va donolar bilan suhbatdosh bo‘ling. Ilmingiz har qancha ko‘p bo‘lsa ham, o‘zingizni ilmsiz hisoblab, yana ilm o‘rganishga kirishing.
   
Allohning avliyo bandalarini sev, ularning ko‘nglini olishga urin! Chunki Alloh taolo har kuni u oriflarning qalbiga uch yuz oltmish marta nazar soladi. Bu nazarlar davomida Alloh seni ham u yerda ko‘rsin.
   
Har gal “La ilaha illalloh” kalimasini zikr etishdan oldin og‘zimni yetmish marta mushku gulob kabi xushbo‘y narsalar bilan yuvaman.
   
Alloh bilan birga bo‘lmoq - farz, dunyodan ayrilmoq - sunnatdir.
   
Nafs shunday sifatki, botildan bo‘lakka yurmas va solih amallar tarafiga hargiz mayl qilmas.
   
Har kishi Xudoni bilsa, Xudoning yodidan o‘zgaga og‘zi ochilmas.
    
Oriflik - Allohni tanimoqdir, Allohni tanimoq - fikr yuritmoq va ixlosli bo‘lmoqdir.
   
Hammadan yomoni semizlik va to‘qlikdir.
    
Xaloyiq ikki ishdan halokatga yuz tutar: birinchisi - maxluqotning hurmatini saqlamaslikdan, ikkinchisi - Alloh bergan ne’matning shukronasini bilmaganidan.
   
O’z nafsini faromush qilgan Allohni yod qilgan bo‘lur.
   
Eng yaxshi kishining ikki qo‘li ham to‘g‘ri bo‘ladi, u bir qo‘li bilangina emas, ikki qo‘li bilan yaxshilik qiladi.
   
Manmanlik qilmang, o‘zingizni boshqalardan yuqori tutmang. To‘g‘ri so‘zlang, to‘g‘ri ishlang, ochko‘zlik va harislikdan uzoqda bo‘ling.
   
Gina-adovatdan uzoq bo‘l, kuching yetmaydigan ishga kirishma. So‘z yurituvchi, chaqimchilarning so‘zlariga ishonma. Chunki ular fitna-fasod yo‘lini izlab yuruvchi yaramas odamlardir.