Abu Turob Naxshabiy

Abu Turob Naxshabiy - o‘rta asr tasavvuf shayxlaridan.

Haq taolo har zamonda olimlarni o‘shal zamona xalqining amallariga munosib so‘zlar bilan gapirtirib qo‘yadi.
  
Sizlar ikki narsani talab qilursizlar, ammo topmaysizlar: birinchisi -shodlik va xushvaqtlik, ikkinchisi - rohat va orom. Bu ikkalasi jannatda bo‘lur.
 
Vaqtiki banda ibodatda sodiq bo‘lsa, ibodat vaqtida huzur-halovat topadi.
 
Xudo yo‘liga kirgan kishiga ozuqsizlik oziqdir.
 
Qanoat deb yemak-ichmakni Alloh taolodan olmoqqa aytiladi.
 
Tavakkul shuki, o‘zingni qullik va bandalik daryosiga tashlagaysan va ko‘nglingni Allohga tashlagaysan - agar bersa, shukr qilasan, agar olsa, sabr etasan.
 
Faqir ulki, uning ovqati - nima topsa, o‘sha bo‘ladi, libosi avratini yopishga yetadi, makoni qaerda o‘ltirgan bo‘lsa, o‘sha yerdir.