Abul Hasan Xaraqoniy

Abul Hasan Xaraqoniy (vafoti 425/1034) - mashhur tasavvuf shayxlaridan, “Bashoratnoma”, “Asror ul-suluk” asarlari bor.

Ikki kishi chiqargan fitnani hatto shayton ham chiqara olmaydi: dunyo hirsiga berilgan olim va ilmsiz so‘fiy.

Eng yaxshi narsa Alloh taoloni unutmagan ko‘ngildir.

Alloh taolo uchun qilingan har ish ixlosdir, xalq uchun qilingan har nima riyodir.

Yo‘l ikkidir: biri - hidoyat, ikkinchisi - zalolat, buzuqlik. Bandadan Alloh taologa ketgan yo‘l - zalolat yo‘lidir.Alloh taolodan bandaga kelgan yo‘l - hidoyatdir. Endi kim hidoyatga erishdim desa, o‘sha hidoyatga erishmagandir. Kim meni hidoyatga erishtirdilar desa, o‘sha hidoyatga erishgandir.

Umrimga qarab yetmish uch yillik ibodatlarimning hammasini bir saotlik qisqa ko‘rdim, gunohlarimga boqib Nuh alayhissalomning umriday uzun ko‘rdim.

Ne’matlarning eng yaxshisi - harakat qilib erishilgani. Do‘stlarning eng yaxshisi - Alloh taoloni eslatgani. Qalblarning eng nurlisi - ichida mol-dunyo sevgisi bo‘lmagan.

Alloh taolo bandasiga toza yurak va rostgo‘y tildan uluroq bir narsa ehson etmagandir.