Do‘stlikning nazokati va dushmanlik razolati
Do‘stga ham, dushmanga ham yaxshilik qilish yaxshidir. Agar do‘stingga yomonlik qilsang, u senga dushman, dushmaningga yaxshilik qilsang, u senga do‘st bo‘ladi.
Nodon do‘st do‘st bo‘laturib shunday kunlarni boshingga soladiki, bu yuzta dono dushmaningning ham qo‘lidan kelmaydi.
Hamma bilan yaxshi muomalada bo‘l, hech kimni o‘zingga dushman qilma!
Ikki dushman butun yer yuziga sig‘maydi, ammo ikki do‘st bir qarich yerga sig‘a oladi.
Do‘stimki, dushmanimga do‘stlik qilarkan, uni men do‘st hisoblamayman. Zaharga qo‘shilgan shakardan ehtiyot bo‘l.
Dushmanlaring bilan apoq-chapoq bo‘lgan do‘stingdan qo‘lingni yuvib, qo‘ltig‘ingga ur.
Kimki do‘stlikni xor aylabdi, uni qismat jazolagay - chiqib tutuni.
O’zgaga qilgan muruvvatingni do‘stga ham, dushmanga ham maqtanma.
Nafratimizga uchragan kimsalarning yordamiga muhtoj bo‘lish og‘ir musibatdir.
G’anim so‘ziga kirish - xatolik, ammo unga teskari ish tutmoq uchun uni tinglamoq darkor. Bu - chinakam haq yo‘ldir.
O’zgalar oldida berilgan nasihat ta’nadek botadi.
Do‘stlar fikridin va dushmanlar makridin beparvolig‘ joiz ermas va bu ish nadomatdin o‘zga natija bermas.
To‘rt narsa borki ozi ham ko‘p: olov, dushmanlik, faqirlik, xastalik.
Yangi do‘st orttirsang, eskisidan yuzingni burma.
Urush - botirni, jahl - dononi, yo‘qchilik - do‘stni sinaydi.
Hamrohini mushkul yo‘lda tashlab ketgan odam hech yerda halovat topmaydi.
Ayol kishiga eng haqqi ko‘p kishi erdir, erkak kishiga eng haqqi ko‘p kishi -onasidir.
Adovat etakka tutashmasin, boq,
Jahonga o‘t qo‘yar misoli chaqmoq.
Parvardigor bizga nasiba qilib yaratgan ne’matlar va ro‘yolar (boyliklar) ichida doim qadr-qimmat qilishimiz lozim bo‘lgan, e’zozlashimiz shart bo‘lgan oliy fazilat - do‘stlik va mehr-oqibatdir.
Do‘stlar diydoridan ortiq quvonch, firoqidan ortiqroq g‘am yo‘q.
Odam do‘stsiz qolgandan ko‘ra aka-ukasiz qolgani afzal.
Donoga yondoshgil, qoch nodondan san,
Hatto u xavflidir dono dushmandan.
Do‘st-do‘stga shunday ko‘zguki, undan tiniqrog‘i yo‘q.
Bitta dushmaning - ko‘p, do‘stlaring minglab bo‘lsa ham - oz.
Nuqsoningni do‘stdan so‘rab yurma, u aytmaydi. Yaxshisi dushmanlarning nima deyishini bil.
Dushman odatda do‘stdan chiqadi.
Qadahboz do‘stlaringni do‘st dema, chunki ular senga emas, qadahingga do‘st.
Ikki narsa dildagi g‘am ofati: do‘st diydori, dono kishi suhbati.
Kimki aybsiz do‘st axtarsa - do‘sti kamayadi. Kimki do‘stini xatosi uchun itobga olsa - dushmani ko‘payadi.
Tuban odam bilan do‘st tutinib, hamsuhbat bo‘lma, chunki uning zarardan boshqa nafi tegmaydi.
Sinamay birovni do‘st tutsang, nolima shu do‘stdan qon yutsang.
Do‘st do‘stdir asli qilmishi bilan,
Do‘st emas «do‘stingman», deyishi bilan.
Do‘stim qolsin, desang mangu do‘st bo‘lib,
So‘zlagin sen ta’bu odatin bilib.
Bag‘ritosh do‘stni dushman hisoblash lozim.
Kim g‘amli kunda yoru mungdosh bo‘lur,
Shodlik kuningda tag‘in yo‘ldosh bo‘lur.
Ablah do‘st dushmandan yomondir, yomon ne hiylani bilsa, ishlatar oson.
Yasovuldan do‘st tanlama, chunki u haqiqatni tan olmaydi. Sen unga ming martalab nonu suv tutqazsang-da, undan bir marta ham issiq (ovqat) so‘rab ololmaysan.
Bu juda yaxshi so‘z, sen ham os quloq,
Nodon do‘stdan ko‘ra dushman yaxshiroq.
Uchta ish sen haqingda do‘stingda yaxshi fikr hosil qiladi: uni salom bilan qarshi olishing, majlisda joy berishing, uni u yaxshi ko‘radigan ismlar bilan chaqirishing.
Dushmaning makr aylasa, undan hiyla bilan qutil, agar temirni tuzatmoqchi bo‘lsang, temir bosqon bilan ur.
Dushman ham uch xil bo‘ladi: dushman, do‘stingning dushmani, dushmanning do‘sti.
Dushmanlikdan emas chayon chaqishi,
Shunday tabiati, fe’lin xohishi.
Dushmaningdan uzoq bo‘l!
Adovat tig‘ini ko‘targan kishi adovat tig‘idan halok bo‘ladi.
Jahonning shodligi yig‘ilsa butun,
Do‘stlar diydoridan bo‘lolmas ustun.
Do‘stingdan ehtiyot bo‘l, ishonchlisi mustasno. Allohdan qo‘rqqangina ishonchli bo‘lur.
Dushmandan muruvvat kutmaganday, pastkash do‘stdan nari yurgan ma’qul.
Birodarlarimiz biz uchun ahli oilamizdan ham qimmatliroqdir. Chunki ahlimiz bizga nuqul dunyoni eslatadi, birodarlarimiz esa - oxiratni!
Har qancha bo‘lsa ham olamda achchiq,
Achchiqroqdir dono do‘stdan ayriliq.
O’zingga sodiq do‘stlar tanla, ular panohida yashaysan, chunki ular kengchilikda ziynat, qiyinchilikda qalqondirlar.
Hakimlarning aytishicha, sinalmagan do‘stga va sinalgan dushmanga ishonmoq katta xatodir.
Ey birodar, munofiqqa bo‘lma ulfat,
Kim ulfatdir boshi uzra yuz ming kulfat.
Do‘stsiz yashash mumkinmas, ammo hamma ham do‘stlikka arziyvermaydi.
To‘zgan paxta bo‘z bo‘lmas, qadimiy yov do‘st bo‘lmas.
Do‘stlaring ko‘payar farovonlikda, ularni sinab ko‘r notavonlikda.
O’z yovin parvarish qilgan odam xom,
Jahonda chiqarar axmoq degan nom.
Tarki suhbat ayladim hamrohi noqobil bilan.
Kishi dushmanidan qutulmagunicha erkin nafas ololmaydi.
Kim aybingni aytsa, u do‘sting, ishon, kim yashirib yursa - zaharli ilon.
Har qancha yaxshilik ko‘rsatilganda ham, dushman qo‘lidan dushmanlikdan bo‘lak ish kelmaydi.
Bu olamda yaxshilar ila do‘stlashishni hamma ham xush ko‘radi. Agar zo‘r bo‘lsang, yomonlarni ham do‘stga aylantira bil.
Do‘stlar bilan ko‘rishib, gaplashib turinglar, g‘am-qayg‘udan qutulishlaringga vosita bo‘ladi.
Zamonning evrilishidan, do‘stlarning bevafoligidan qilayotgan shikoyating gunohlaringning senga qoldirgan merosidir.
Do‘stlar bilan totuv yasha, urishib undan ayrilma. Qo‘lingdagi tovuqni chiqarib yuborib, yana boshqatdan qidirma!
Kulfatda bilaylik do‘stu dononi,
Qalqon bo‘lajak u sinalgan oni.
Tirik qolib g‘anim bo‘lgandan shodon,
Sharaf bilan o‘lish yaxshiroq chandon.
Ikki kishidan sen yashirma darding:
Biri tabib erur, biri - hamdarding.
Chinakam do‘st aytgan har o‘git, masal -Sirti zahar erur, tomiri - asal.
Do‘st uyida mehmon bo‘lgan vaqtingda qo‘lingni, ko‘zingni, tilingni tiya bil.
Kimki dushmandan qilmadi hazar, Oqibat undan ko‘radi zarar.
Dushman lashkari ichida kelishmovchilik bor ekan, sen o‘z shamshiringni qinidan sug‘urmay qo‘yaber!
Dunyoda do‘sting kim, dushmaning kim - boq, ishlaring hisob et, yozilmish qandoq.
Ko‘rdimki, eng noyob ne’mat rostgo‘ylik va mardlik, eng og‘ir balo munofiq do‘stlar ekan.
Aybsiz do‘st qidirgan kishi yakkalanib qoladi. Arzimas aybi uchun xafa bo‘laveradigan kishining do‘stlari dushmanga aylanaveradi. Do‘stining o‘zidan o‘zib ketayotganini ko‘ra olmagan kishi g‘am ostida yuraveradi.
Xo‘mrayib har kimsa achchiq so‘zlagay,
Do‘stlari undan qochishni ko‘zlagay.
Har kimdan istama do‘st-oshnolik, har oshnadan kutma sen ro‘shnolik.
Arpasiz ot qir osholmaydi, yo‘ldoshsiz botir jangda yengolmaydi.
Yaxshi libos tanga oroyish,
Yaxshi qo‘ldosh jonga osoyish.
Men umrim davomida ixlosmandlarimga qaraganda tanqidchi do‘stlarimdan, ayniqsa ularning tanqidi muloyim va do‘stona suxan bilan izhor etilganida ko‘proq foyda olganman.
Kim agar do‘stlar bilan yakdil bo‘lur,
Barcha maqsudi aning hosil bo‘lur.
Shodli va qayg‘uli paytlarida dilini kuduratdan tozalab, sof do‘stlikni saqlab qolgan kishi chin do‘st hisoblanadi.
Shaxsingizga dushmanlik qilganni avf etingiz. Lekin vataningizga, millatingizga va diningizga dushmanlik qilgan kishini kechirmangiz.
O’zini o‘ylaguvchi xudbin do‘stingdan jonini yo‘lingga tikkan it yaxshi.
Millatimizni zaif ahvolga solgan sabablardan biri atrofimizda yurgan do‘st suratidagi hiylakorlarga nisbatan soddaligimizdir. Holbuki, inson har qanday va’daga aldanavermasligi, har bir yo‘l ko‘rsatuvchiga ishonavermasligi lozim.
Oqil do‘sti bor kishining oynaga ehtiyoji yo‘qdir.
Istasang dunyoda baxtu saodat,
Aylagil qardoshlar diydorin odat.
O’ziga do‘st topolmagan kishi odamlarning eng ojizi sanaladi. Bundan ham ojizrog‘i esa oldiniga birorta do‘st topadi-yu keyinchalik uni ham yo‘qotib qo‘yadi.
Birodaringdan sen o‘ylagandek foyda kelishi uchun uning ishini yaxshilab o‘rinlatib qo‘y!
Kim tortsa adovat qilichin qindan,
Adovat tig‘idan bo‘ladi halok.
Oqil kishilar do‘st bilan dushmanni, dushman bilan do‘stni almashtirmaydilar.
Ulfati yaxshi kishining o‘zi ham yaxshi bo‘lur, yaxshi ulfatli kishidan ko‘p yaxshilik kelur.
Do‘stlar dilini ranjitish dushmanni murodiga yetkazishdir.
Dunyoda eng yomon xislat do‘stlarga qilinadigan makr bilan hiyladir.
Hammaga omonlik istaguvchi bo‘l,
Shunda adovatga qolmagay hech yo‘l.
Dushman bilan hamsuhbat bo‘lganingda ham o‘zingni undan baland tutma!
Chin birodar og‘ir kuningda bilinadi.
Bir ming nafs adovat oldida bir odamcha ham bo‘lmas.
Kimki adovatu xusumatni eksa, albatta u tashvishu mashaqqat o‘radi.
Bu xarobazorda istasang rohat,
Do‘stga qo‘shilib top dilga halovat.
Agar sirlaringni dushman bilmasligini xohlasang, uni do‘stingga aytmagin.
Og‘ir kunlarda yoningda turgan odamgina in’omga sazovordir.
Samimiy do‘sti bilan maslahatlashib ishga tutinish, dushman bilan murosa qilish, achchiq so‘zni yutish va nafsni tiyish odamni barkamol qiladi.
So‘zlagan vaqtimda og‘zimdan beixtiyor yaramas, bo‘lmag‘ur so‘zlar ham chiqishi mumkin. Dushman esa og‘zimdan chiqqan yomon so‘zlarnigina terib oladi. Chunki dushmanning nazari yomondan bo‘lakka tushmaydi.
Aqlli, odobli, diyonatli odam bilan do‘st tutinish kerak. Bunday go‘zal sifatlarga ega odam samimiy do‘st bo‘ladi. Samimiy do‘st hech vaqt seni unutmaydi, sendan yordamini ayamaydi, hojatingni ado etadi.
Nafsing uchun hech maxluq bilan xusumat qilmagin.
Kimki birodarlikni xorlasa, odamgarchiligi ketadi, kimki sultonni xorlasa, dunyosidan benasib bo‘ladi, kimki solihlarni xorlasa, oxiratidan benasib qoladi.
Dushmanni o‘zingga mahrami jon qilma,
O’z joningga jabru nuqson qilma.
Hayvonlarning tabiatlarida kushandalaridan nafratlanish, dushmandan o‘zini qo‘riqlash bor.
Qurol hozirlashni unutgan askar asir bo‘ladi.
Yaxshi qarindoshlik chidamlilik bilan yuzaga keladi.
Hisob va sarf muomala uchun, uzr hamda ixlos do‘stlik va muhabbat uchundir.
Ko‘p o‘qilgan
- Namoz o‘qish tartibi (rasmlari bilan)
- Peshin, asr, shom, xufton namozlari
- Qur'oni karim ma'nolari va qiroati
- Salovotlar. Istig'for duolari
- Namoz kitobi
- Najotkor duolar
- 6 diniy kalima
- Tahorat olish tartibi (rasmlari bilan)
- Azon
- Namozdan keyingi zikrlar
- Ro‘za kitobi
- G‘usl, tayammum
- Namozdan so‘ng o‘qiladigan boshqa duolar
- Tahorat kitobi
- Islomning o‘zagi bo‘lgan hadislar
- Payg’ambar alayhis-salomning vafot etishlari
- Jamoat kitobi
- Hayit va jum'a namozlari
- Xotinning eriga itoatsizlik qilishi
- Namoz haqida oyat va hadislar
So'nggi maqolalar
- Mujohid ibn Jabr
- Abu Usayd Molik ibn Robia
- Xotib ibn Abu Balto
- Abon ibn Said
- Budayl ibn Varqo
- Abu Sa’laba Xushaniy
- Abu Umoma Bohiliy
- Abu Mahzura Jumahiy
- Abu Abs ibn Jabr Ansoriy
- Rofeʼ ibn Xudayj
- Zaydul Xoyr
- Ummu Kulsum binti Uqba
- Qays Ibn Sa’d
- Navfal ibn Horis
- Solim ibn Ubayd
- Ka’b ibn Zuhayr
- Mehron ibn Mofina
- Hanzala ibn Abu Omir
- Abdulloh ibn Muborak
- Qutayba ibn Muslim
2004-2024 © islom.ziyouz.com. Saytdan materiallar olib chop etilganda manzilimiz ko‘rsatilishi shart.