Mahr berishning belgilangan alohida muddati bormi?

Savol: Mahr berishning belgilangan alohida muddati bormi?

Javob: Mahr berish vaqti kelishuv asosida belgilanib, nikoh aqdi paytida naqd yo undan so‘ng nasiya bo‘lishi mumkin. Agar muddati belgilanmagan bo‘lsa, urfga e'tibor qilinadi.

Mahr naqd tayin qilinib, hali uzilmagan holda ayol turmush munosabatlariga kirishmaslikka haqqi bor. Bu hol ayolning nafaqasini er zimmasidan soqit etmaydi.

Nikohdan so‘ng ayol olgan mahrini eriga hadya qilishi yoki miqdorini kamaytirishi mumkin.

Nikohdan so‘ng qovushuv, xilvatda yolg‘iz qolishlari, er yo xotindan birining vafoti mahrni to‘la berishni vojib etadi. Agar er qovushuv sodir bo‘lmay yo xilvati sahihada qolmay, xotinini taloq qilsa, mahrning yarmini berishi vojibdir. Ammo bu holda mahr miqdori belgilanmagan bo‘lsa, er xotiniga muta' (ro‘mol, ko‘ylak va chadra) taqdim etishi vojib bo‘ladi.

Shuningdek, mahri belgilanib, qovushuvdan oldin ajralishgan ayoldan boshqa barcha qo‘yilgan ayollarga erining muta' taqdim etishi mustahabdir.

Dinda savolim bor