Azon qanday aytiladi?

Savol: Azon aytuvchi (muazzin)ning sifatlari qanday bo‘lishi kerak va u nimalarga e'tiborberishi lozim?

Javob: Muazzin oqil, solih, taqvodor, sunnatlarni va namoz vaqtlarini bilgan kishi bo‘lishi kerak. U namozxonlar hozir bo‘lish miqdorida azon va takbir orasida kutishi kerak. Shom namozida azon va takbir orasida uch qisqa oyat o‘qiladigan darajada kutiladi.

Savol: Azon qay holatda makruh hisoblanadi?

Javob: Azon kalimalarini noto‘g‘ri talaffuz qilib, qo‘shiqqa o‘xshatib (talqin) aytish, junub holatda azon aytish, balog‘atga yetmagan bola, telba, mast, fosiq (gunohi kabira qilib, shariat amrlarini bajarmagan kimsa) va o‘tirgan kishilarning azon aytishlari makruhdir. Bunday hollarda azonni takroran aytish mustahabdir. Takbir (iqomat) takror aytilmaydi.

Savol: Juma kuni peshin namoziga azon aytiladimi?

Javob: Yo‘q, juma kuni uzr bilan juma namoziga bormaganlarning peshin namoziga azon va iqomat aytishlari makruhdir.

Savol: Muazzin iqomatni yurib aytishi mumkinmi?

Javob: Muazzin azon va iqomat aytayotganida yurishi va gapirishi joiz emas. Chunki bu ikkisi namoz singaridir. Agar «Qod qomatis-solah»ga kelsa, ixtiyorlidir: iqomatni joyida tugatishi yoki boshqa safga o‘tish uchun yurishi mumkin («Fatovoi Qozixon»).

Dinda savolim bor